អន្តរជាតិ: Nice និង Olympique de Marseille ត្រូវបានកោះហៅឱ្យចូលសវនាការវិន័យកាលពីថ្ងៃពុធបន្ទាប់ពីការប្រកួត Ligue 1 ចុងសប្តាហ៍របស់ពួកគេត្រូវបោះបង់ចោលដោយសារតែបញ្ហាអ្នកគាំទ្រ។ ការប្រកួតនៅកីឡដ្ឋាន Allianz Riviera របស់ Nice ត្រូវបានបោះបង់ចោលនៅនាទី៧៥ កាលពីថ្ងៃអាទិត្យដោយសារតែក្រុមកីឡាករ Marseille បានប៉ះទង្គិចជាមួយអ្នកគាំទ្ររបស់ពួកគេដែលបានគប់ពួកគេដោយដបនិងរបស់ផ្សេងៗទៀតមុនពេលសម្រុកចូលទីលាន។

អ្នកគាំទ្រមិនសប្បាយចិត្តជាមួយនឹងវិធីសាស្ត្រដែលក្រុមកីឡាកររបស់ពួកគេបានលេងខ្សែបម្រើ Dimitri Payet របស់ក្លឹប Marseille ត្រូវបានគប់ចំមួយដបខណៈដែលកីឡាកររូបនេះរៀបនឹងទាត់បាល់ជ្រុង។ ការឈ្លោះប្រកែកគ្នាបានផ្ទុះឡើងខណៈពេលគាត់បានបោះដបត្រឡប់ទៅវិញ។ អ្នកគាំទ្របានសម្រុកចេញពីកន្លែងឈរចូលទៅក្នុងទីលាន។

រដ្ឋមន្ត្រីក្រសួងកីឡាបារាំងបានពណ៌នាហេតុការណ៍នេះថាជារឿងគួរឱ្យសោកស្តាយ បន្ថែមពីលើការស៊ើបអង្កេតរបស់សម្ព័ន្ធបាល់ទាត់បារាំងការស៊ើបអង្កេតតាមផ្លូវតុលាការក៏ត្រូវបានចាប់ផ្តើមផងដែរ៕